Gimɗol : Cakito Ɓoggi ɗin Taƴa

 

 

Cakito, ɓoggi ɗin taƴa

Geno wallu men daɗa

Men heɓta ko men faɗaa

Neeɓii meɗen haɗaa

Keɓe amen jaɓitaa

Ɗe fow ɗe sennditaa

To amen men raɗaa

Woɓɓe waraa suuɗaa

Woɓɓe wenngaa kene yi’aa

Woɓɓe nanngaa sokaa

E kasooji jukkinaa

E laawi fellaa tufaa

Galleeji helaa rewɓe doolaa

Woɓɓe haɓɓaa naɓoraa

Jiiɓaa seekaa lollinaa

Taƴooɓe laawi e Fuuta

Añɓe elti waɗaa

Warooɓe saakitaa

Bonnooɓe ñalorma e jemma

Yarooɓe ƴiiƴam dekka

Neɗɗo, wakkoo pinka samma

Sakkoo e ɗate-cele waaña

Ko “Donso” ittaaɓe fiira

Heeferɓe ɓe anndaa diina

Cakito, janngaa winndaa

Jannginaa laaɓa, masaa

Kaatime helaa yollaa

Ko Jooma daali taraa

Ko O anndini fanoraa

Coora e corte woororaa

Cakito, haɓɓito tiiɗaa

Kese e kiɗɗe alnoraa

Fuuta yahaa ndaartaa

Suusaa eɓɓaa siinaa

Ko woɗɗi feŋtanaa

Ko ɓadii firtaa

Awa janngu firaa

Geno wallete fiiraa

Laawol ngol yiitaa

Gaño dogete foolaa

Kalla, piɓi, e talki taƴa

Donso hula ukkoo wulaa

Ɓoggi añɓe ɓen taƴa

Suusaa eɓɓaa feŋtaa

A jaaloto foolaa poomaa

Saajo Bah
Nederland
www.peeral.com