Jeudi, 26 Juillet 2012 14:59
Mi sikkuno si kaaki ɗayɗii saamii,
Ko pilitti, piindi e ndimndi saatii, si ndiyam saaƴii
Mi sikkuno nde Konte nawyunoo o nawni o faatii,
Ko ɗon satteende dartii Guinee hettii
Mi sikkuno gooto wippataako geɓe hawttaaɗe ka waalii
Ko ɗon Dadis immii wippii laamu Guinee hawtaangu o ardii
Mi sikkuno fodoore Dadis Suɓo hino saatii
Ko ɗon o firti fodoore makko e hoore bewre o ardii.
Guinenaa, buy faatii e fewndo fewjoore Dadis
Ko ɗon Tumba immii dankaranii dartii jippiri e Dadis
Guinenaaɓe seedii jippiro Tummba e Dadis
Nduggu hentii pinka fetti Tumba muti Dadis jukki sortii
Guinenaaɓe fodaa suɓo e hoore laaɓal si hewtii
Nduggu hentii Konate ,Kompawore e Doore ardii
Guinenaaɓe suɓii halfinaaɓe suɓo inni Konde foolii
Mi sikki goonga waylaama enee ko pellet Sellu foolii
Sikke alaa pellet Allah hino anndi Sellu ɓe toonyii
Awa haande ƴiiƴam e gomɗi Wiimiye en hibbii ilii
Sikke alaa pellet yoga e fewjooɓe Guinee ɓen toonyii
Ko honɗum innitorɓe danndugol hakkeeji neɗɗaŋkeyaal jooɗii
Wiimiye yananaama piyaama jattaama yoga sokaama buy maayii
Ko honto woni diinayaŋkooɓe hara ɓe munni kaa ɓe huccii
Wiimiye! Waasere needi e yawre kawte heewii
Wiimiye accu hakkee taw haanuɗo yottaade neeɓnii
Wiimiye! Immo daranoɗaa ndimumaa e leydimaa a mulii
Wiimiye! immo! dadito darto ganyomaa, rewɓe e fayɓe wulli
Wiimiye !
Annditu si cuucal e pottal tawtii kuugal haray ko poolal e maloore saatii.
Kuɗol: Mohamed Jalloh (Iwdifalahi)
Mawɓe Fuuta maaki woo:
“Wa’u wano mi wa’i, ko waanndu e ɓiɗɗo mun”
Transmis par Ahmed Tidiane Barry
Source : www.peeral.com
